شوبز انڈسٹری کے سینئر اور باصلاحیت اداکار اعجاز اسلم نے حالیہ گفتگو کے دوران اپنے کیرئیر کے ابتدائی دور کے مقبول ڈرامہ سیریل ’کشکول‘ سے جڑی یادوں کو تازہ کرتے ہوئے اس میں کام کے تجربات، کردار کی تیاری اور اُس وقت کے ماحول سے متعلق دلچسپ باتیں مداحوں سے شیئر کیں۔
فوٹو شیئرنگ ایپ انسٹاگرام پر اداکار اعجاز اسلم نے ’کشکول‘ کی چند تصاویر کا کولاج شیئر کیا جس میں وہ کاسٹ کے ساتھ موجود ہیں۔
انہوں نے تصاویر شیئر کرتے ہوئے لکھا کہ ’اپنے پہلے ڈرامہ سیریل ’کشکول‘ سے کچھ یادیں شیئر کررہا ہوں، کیسا دور ہے، کیا آغاز ہے، میں نے ’روشو‘ کا کردار ادا کیا جو اپنے آپ میں مشہور ہوگیا۔
اعجاز اسلم نے کہا کہ ’کشکول سوشل میڈیا یا یوٹیوب کے بغیر ایک زبردست ہٹ بن گیا، جب اسٹارڈم خالصتاً کارکردگی، کہانی اور سامعین کے ساتھ تعلق پر بنایا گیا تھا۔
اداکار نے لکھا کہ سیٹ پر قدم رکھنے سے پہلے ہم نے بے شمار مشقیں کیں، جو آجکل نایاب ہے۔
شوبز انڈسٹری اب مکمل طور پر بدل گئی ہے، لیکن زندہ رہنے اور ترقی کی منازل طے کرنے کے لیے آپ کو اس کے ساتھ بڑھنا ہوگا پھر بھی شکر گزار ہوں کہ یہ سب کہاں سے شروع ہوا۔
