برطانیہ کی معروف آٹوموبائل سروس اور روڈ اسسٹنس کمپنی رائل آٹوموبائل کلب نے ڈرائیورز کو سردیوں میں اپنی گاڑی کے ونڈشیلڈ وائپرز پر پرانے موزے رکھنے کی تجویز دی ہے۔ کمپنی کے مطابق سردیوں میں وائپرز پر برف یا آئس جم جانا عام مسئلہ ہے، اور پرانے موزے وائپرز اور شیشے کے درمیان حفاظتی تہہ کا کام کرتے ہیں، جس سے وائپرز برف سے چپکنے سے بچ جاتے ہیں۔
اس طریقے سے نہ صرف برف کو کھرچنے کی ضرورت کم ہوتی ہے بلکہ گاڑی کے وائپر موٹر اور فیوز بھی محفوظ رہتے ہیں۔
ڈرائیورز کو یہ بھی مشورہ دیا گیا ہے کہ اگر موزے دستیاب نہ ہوں تو ہلکا کارڈ بورڈ، اخبار یا پتلا پلاسٹک استعمال کیا جا سکتا ہے، بشرطیکہ یہ چیزیں خشک اور صاف ہوں تاکہ وائپرز یا شیشے کو نقصان نہ پہنچے۔
اس طریقے سے وائپرز کی زندگی بھی لمبی ہوتی ہے، کیونکہ جمے ہوئے وائپرز استعمال کرنے سے موٹر خراب ہو سکتی ہے یا فیوز اُڑ سکتے ہیں۔
ڈرائیورز کو مشورہ دیا گیا ہے کہ صبح گاڑی چلانے سے پہلے یقین کر لیں کہ وائپرز شیشے سے الگ ہو چکے ہیں، ضرورت ہو تو ڈیفروس یا آئس کھرچنے کا مناسب سامان استعمال کریں۔
