حکومت نے نوجوان طلبا کو لاکھوں کروم بکس فراہم کرنے کا اعلان کر دیا۔
چیئرمین وزیر اعظم یوتھ پروگرام رانا مشہود احمد خان نے نوجوان طلبا کے لیے بڑی خوشخبری سنا دی۔ انہوں نے پریس کانفرنس کرتے ہوئے کہا کہ حکومت نوجوانوں کو ترقی کے مواقع فراہم کرنے اور انہیں بااختیار بنانے کے لیے عملی اقدامات کر رہی ہے۔ جو حکومت کی اولین ترجیح ہے۔
رانا مشہود احمد نے کہا کہ بیرون ملک مقیم پاکستانی ملک میں سرمایہ کاری میں دلچسپی رکھتے ہیں۔ جس سے نہ صرف ملکی معیشت کو فروغ ملے گا بلکہ روزگار کے نئے مواقع بھی پیدا ہوں گے۔
انہوں نے اعلان کیا کہ ٹی ٹی کئیر فاؤنڈیشن کی جانب سے نوجوانوں کے لیے 12 لاکھ کروم بکس فراہم کیے جائیں گے۔ جن میں سے 7 لاکھ کروم بکس فوری طور پر طلبا میں تقسیم کیے جائیں گے۔ جبکہ مزید 5 لاکھ کروم بکس جون 2026 تک فراہم کر دیئے جائیں گے۔
رانا مشہود نے کہا کہ آئندہ 2 برسوں کے دوران پاکستان بھر کے طلبا کو مزید 30 لاکھ کروم بکس فراہم کرنے کا بھی منصوبہ ہے۔ ان اقدامات سے آن لائن تعلیم کے فروغ میں مدد ملے گی۔ اور طلباء کو جدید ڈیجیٹل سہولیات تک رسائی حاصل ہو سکے گی۔
انہوں نے کہا کہ کروم بکس کی تقسیم مکمل شفافیت کے ساتھ کی جائے گی۔ اور اس پروگرام میں آزاد کشمیر اور گلگت بلتستان کے طلباء کو بھی شامل کیا جائے گا۔ تاکہ ملک بھر میں یکساں تعلیمی مواقع فراہم کیے جا سکیں۔
