آج کل سوشل میڈیا پر صحت سے متعلق مختلف تحقیقاتی نتائج شیئر کیے جا رہے ہیں، جن کی بنیاد پر کھانے پینے کے حوالے سے کئی غلط فہمیاں عام ہو گئی ہیں۔ ان میں سے ایک یہ بھی ہے کہ مائیکرو ویو میں کھانا گرم کرنے سے کینسر ہوسکتا ہے۔ سوال یہ ہے کہ یہ حقیقت ہے یا محض افواہ؟
ماہرین کا کہنا ہے کہ یہ محض افواہ ہے اور مائیکرو ویو میں کھانا گرم کرنا بالکل محفوظ ہے۔
مائیکرو ویو اوون میں استعمال ہونے والی ریڈیائی لہریں الیکٹرو میگنیٹک ریڈی ایشن کی ایک شکل ہیں، جو موبائل فونز، موسم کی پیش گوئی اور جہازوں کی نیویگیشن میں بھی استعمال ہوتی ہیں۔
اگرچہ کچھ تابکاری کینسر کے خطرے کو بڑھا سکتی ہے، لیکن مائیکروویو اوون اس حوالے سے تشویش کا باعث نہیں ہیں۔
مائیکرو ویو اوون کھانے کے اندر موجود پانی کے مالیکیولز کو حرکت دے کر حرارت پیدا کرتا ہے، جس سے کھانا گرم ہو جاتا ہے۔ تاہم اس عمل سے کینسر کا خطرہ بڑھنے کا کوئی ثبوت نہیں ملا ہے۔
ماہرین کے مطابق، اگر مائیکرو ویو اوون حفاظتی معیار کے مطابق استعمال کیا جائے، تو یہ کسی بھی قسم کے صحت کے مسائل یا کینسر کا سبب نہیں بنتے۔
اوون اس طرح ڈیزائن کیے جاتے ہیں کہ ریڈی ایشن باہر نہیں نکلتی اور توانائی صرف کھانے کی سطح تک محدود رہتی ہے۔
مائیکرو ویو اوون میں کھانا گرم کرتے وقت صرف یہ ضروری ہے کہ سبزیوں کو ڈھانپ کر اور تھوڑا سا پانی ڈال کر گرم کیا جائے تاکہ ان میں موجود وٹامنز اور معدنیات محفوظ رہیں۔
مائیکرو ویو اوون کا دروازہ ہمیشہ صحیح طریقے سے بند کریں تاکہ کوئی ریڈی ایشن باہر نہ نکلے۔
مائیکرو ویو کے لیے مخصوص برتن کا استعمال کریں تاکہ کھانے کو بہتر طریقے سے گرم کیا جا سکے اور اوون میں کسی قسم کی چنگاری نہ ہو۔
جب مائیکرو ویو اوون چل رہا ہو تو اس کے قریب نہ جائیں، اگرچہ اس سے کوئی خطرہ ہونے کا امکان بہت کم ہوتا ہے۔
مائیکرو ویو میں کھانا گرم کرنے سے کینسر ہونے کا کوئی سائنسی ثبوت نہیں ہے، اور یہ افواہ محض غلط فہمی پر مبنی ہے۔
لیکن اگر آپ کے ذہن میں کسی بھی قسم کی صحت سے متعلق شکایات ہیں تو ماہرین کا مشورہ لینا بہتر ہے۔
