ملک بھر کے بجلی صارفین کے لیے خوشخبری ہے کہ بجلی کی قیمت میں کمی کا امکان پیدا ہو گیا ہے۔ اگر سینٹرل پاور پرچیزنگ ایجنسی (سی پی پی اے) کی جانب سے دائر کی گئی درخواست منظور ہو جاتی ہے تو نومبر کی ماہانہ فیول ایڈجسٹمنٹ کے تحت بجلی 72 پیسے فی یونٹ سستی ہو سکتی ہے۔
اس مقصد کے لیے سی پی پی اے نے نیشنل الیکٹرک ریگولیٹری اتھارٹی (نیپرا) میں باقاعدہ درخواست جمع کرا دی ہے۔
نیپرا اس درخواست پر 31 دسمبر کو سماعت کرے گی، جس کے بعد حتمی فیصلہ کیا جائے گا۔
درخواست میں بتایا گیا ہے کہ نومبر کے دوران ڈسکوز کو مجموعی طور پر 7 ارب 81 کروڑ 30 لاکھ یونٹس بجلی فراہم کی گئی۔
نیپرا میں جمع کرائی گئی دستاویزات کے مطابق اس عرصے میں بجلی کی فی یونٹ لاگت 6 روپے 16 پیسے رہی۔
دستاویزات میں مزید بتایا گیا کہ بجلی کی پیداوار میں مختلف ذرائع کا استعمال کیا گیا۔
نومبر کے دوران 39.16 فیصد بجلی پانی سے پیدا کی گئی، 9.34 فیصد مقامی کوئلے، 5.06 فیصد درآمدی کوئلے، 8.44 فیصد گیس، 8.64 فیصد درآمدی ایل این جی اور 25.23 فیصد بجلی جوہری ایندھن سے حاصل کی گئی۔
نیپرا کی جانب سے درخواست منظور ہونے کی صورت میں بجلی صارفین کو 72 پیسے فی یونٹ بجلی سستی ملےگی۔
