اداکارہ ثروت گیلانی نے کہا ہے کہ ویب سیریز یا فلموں میں خواتین کی سگریٹ نوشی کو آزادی یا خودمختاری کی علامت سمجھنا درست نہیں۔ ایک حالیہ انٹرویو میں انہوں نے وضاحت کی کہ ایسے مناظر کسی کردار کی نفسیات اور کہانی کی ضرورت کے تحت پیش کیے جاتے ہیں، نہ کہ انہیں طاقت یا آزادی کے تصور سے جوڑا جائے۔
ثروت گیلانی نے مزید کہا کہ معاشرے میں کچھ خواتین سگریٹ نوشی کرتی ہیں، اس لیے ایسے کردار حقیقت کے قریب دکھائے جاتے ہیں، لیکن ان مناظر کو خواتین کی خودمختاری سے جوڑنا غلط فہمی ہے۔
اداکارہ نے ٹی وی ڈراموں اور ویب سیریز میں کام کرنے کے انداز میں فرق پر بھی روشنی ڈالی۔
ان کے مطابق ڈیجیٹل پلیٹ فارمز پر کام کی رفتار زیادہ تیز ہوتی ہے، جہاں اداکار کو جذباتی مناظر کے لیے صرف چند سیکنڈز میں اثر پیدا کرنا ہوتا ہے، جبکہ روایتی ڈراموں میں وقت نسبتاً زیادہ ملتا ہے۔
اداکارہ نے مزید کہا کہ وہ اپنے کرداروں کے ذریعے خواتین کے حقیقی مسائل اور سماجی رویوں کو اجاگر کرنا چاہتی ہیں تاکہ ناظرین میں آگاہی اور تبدیلی پیدا ہو۔
