کویت کی کابینہ نے قومی دن اور یومِ آزادی کے موقع پر سرکاری اداروں میں دو روزہ عام تعطیل کا اعلان کر دیا ہے، جس کے باعث سرکاری ملازمین کو مجموعی طور پر چار چھٹیاں ملیں گی۔
گلف نیوز کے مطابق یہ فیصلہ وزیرِ اعظم Sheikh Ahmad Al-Abdullah Al-Sabah کی زیرِ صدارت ہونے والے کابینہ کے ہفتہ وار اجلاس میں کیا گیا۔
اعلامیے کے مطابق عام تعطیل بدھ 25 فروری اور جمعرات 26 فروری کو ہوگی۔
ان دنوں تمام وزارتوں، سرکاری اداروں اور متعلقہ محکموں میں کام معطل رہے گا۔ چونکہ جمعہ اور ہفتہ پہلے سے ہفتہ وار تعطیلات ہیں، اس لیے سرکاری ملازمین کو مسلسل چار دن کی چھٹیاں میسر آئیں گی۔
سرکاری دفاتر میں معمول کے اوقاتِ کار کا دوبارہ آغاز اتوار یکم مارچ سے ہوگا۔
حکام نے واضح کیا ہے کہ خصوصی آپریشنل ضروریات کے حامل ادارے عوامی مفادات اور ضروری خدمات کے تسلسل کو یقینی بنانے کے لیے اپنی تعطیلات کا انتظام خود کریں گے۔
